تلاتين يا سيدى تلاتين
تلاتين ومش مكفيين
خلاص بقى عدينا التمانين
كفاية على كدة متشكرين
زهقنا من كلمة حاضر وأمين
عايزين نغير ونتغير ونعوض السنين
بقينا من اللحمة محرومين
وللهدمة مش لابسين
زهقنا وعود كدابين
كفايانا فى العسل نايمين
عايزين بلدنا تبقى للمصريين
مش للحرامية والنصابين
ونعيش زى اللى عايشين
ولا إنتوا ورثتونا مع الأطيان والملايين
يا خسارة يا مصر
دمعتى سايلة على خدى
ببكى على بلدى لوحدى
كنت زمان بقول مين أدى
بأعلى صوت عندى
إن أنا مصرية على العز متربية
عيونى عسلية وخدودى قمحية
أبويا سعد زغلول وأمى صفية
جدى مينا وجدتى حتشبسوت القوية
بس دلوقتى قلبى متحسر متكسر على وطنى
بكتم صرختى جوايا على بيع أملاكى وأرضى
راح الأمان من بلد السلام
بلد ناصر والسادات ده كلام عدى وفات
يا خسارة يا مصر
ال80 مليون قالوا كلمتهم
عُمر الخوف ما حيهزمهم ولا حيسكتهم
خلاص كل القيود إتكسرت
وعلى إيدين شبابنا إتبعترت
بس يا ترى حشوف أحلامنا إتحققت
ولا أوهام عشناها وإنتهت
إرجعى يا مصر زى ما كنتى
بيتى وأهلى وعزوتى وعشيرتى
إجمعى الحبايب حواليكى
حطى إيدى فى إيديكى
سعدينى نعوض اللى فات
متقوليش تهيؤات
لسة قدامنا فرصة ولو 1%
نعيد الأيام الخوالى دى مش أحلام خيالية
إرجعى يا مصر
إرجعى لينا خلينا نحقق أمانينا
متخلنيش أقولها تانى
والدمعة سايلة من عينينا
يا خسارة يا مصر
26/1/2011
