محبوسة
جوة جدران الحياة
عايزة أنطلق
نفسى أطير
زى العصافير
اللى عندها جناحات
ليه أنا معنديش زيها؟!
عشان أشوف السما
وألمس النجوم البعيدة
عايزة أقطع قميصى
اللى خانق روحى
وأفك القيود
اللى كتمة نوحى
عايزة إيد تحن علية
عايزة عين تحسسنى بالأمان
ليه مش شايفة أى طريق
يكون أخره نور
أنا طريقى مظلم
بطلع من نقطة سودة
أدخل فى نقطة أسود
بس المرة الجاية
أكيد حستريح
عشان حبقى لوحدى
فى عالم من غير دوشة
من غير زعيق
من غير إعملى وما تعمليش
فى العالم ده حبقى على راحتى
فى عالم ودنيا جميلة
كلها شجر وعصافير
حطير معاهم وبراحتى
حطير معاهم ولوحدى
مش عايزة حد
يشاركنى فى راحتى
محدش شاركنى
فى ألمى وحزنى بدنيتى
مش عايزة أشوف حد فى مملكتى
من اللى نغصوا علية عيشتى
لا. عايزة حبيب هجرنى
ولا.عايزة قلب كسرنى
مش عايزة أشوف اللى عملوا نفسهم حبنى
وطلعوا قلوب بتكرهنى
خلاص حطلع من سجنى
وروح للى يرحمنى
18/7/2010
1 مساءاً
هناك 4 تعليقات:
ياه يا ايمان قد كده انتي نفسك تروحي للجنه وتسيبي الدنيا الوحشه دي هي فعلا دنيا وحشه ملهاش امان خواطر جميله يا ايمان وربنا يوفقك
ميرسى لحضرتك بس ممكن اتعرف على اسمك . وشكرا لتعليقك
حاسة بوحدة .. تمرد على الأوضاع اللى مخالفة مبادئك .. عايشة فى عالم خاص بيكى تحكى و تشكى و تبكى فية ، تندمجى شوية مع الحياة بس لما تشوفى سلبيتها تهربى للعالم بتاعك من تانى
كتير بتبكى و أنتى بتدارى دموعك .. عايشة على الزكريات .. وفى قصة جواكى ملقتيش ليها نهاية عندك
بس رغم كدة أنتى أوقات بتملى وحدتك .. وحدتك اللى مصاحباكى و انتى بين الناس
أصبرى و أحلمى تفائلى اللى جايلك حلو أوى .. و خليكى على مبادئك :)
رامى الجنزورى - جريدة الحقيقة
شكرا يا رامى على تعليقك انت اختصرت اللى نفسى اقولله فى سطور شكرا لك
إرسال تعليق